“Madu Myit Hte Dawjau Chye Ai Ramma” ngu ai ga baw hte ramma sharin hpawng galaw

Mungmyit Sinli Ga, Kachin Sub-state, Kutkai Buga Ramma Komiti kaw nna woi awn nhtawm “Madu Myit Hte Dawjau Chye Ai Ramma” ngu ai ga baw hte Kutkai Buga Edin dawlawk nawku hpung mahta hpaji ginra hta 2022 ning ginhtawng ramma camp chyum sharin hpawng galaw nga ai lam, Kutkai Buga Muna Kyithkai Hpa-Awn tsun ai kaw na chye lu ai.

Sharin sara hte sharin ga baw ni gaw, Rev. Dr. Lahtaw Gum Se (Hkristu Hta Myu Hte Mungdan Gawgap Ga), Sara Latau Zau Lat (Madu Myit Hte Dawjau Chye Ai Ramma), Saranum Lahpai Hkawn Tawng (Pre-Marriage), Saranum Tangbau Htu Lum (Hpaji Ningli Laika), Saranum Nan Mya Han (Hka Lup Makam) ni rai nna, Rev. Maran Hka Li Awng hte Rev. Dr. Lahtaw Zau Awng (KTC, Kutkai Jawng Up) yan gaw shana na aten hta lakjet jaw ai lam chye lu ai.

Ginhtawng chyum sharin hpawng hpe shaning shagu galaw ai raitim, 2020 hte 2021 ning hta gaw COVID-19 ana zinli a majaw, ginhtawng chyum sharin hpawng hpe nlu galaw dat ai hku rai nga ai. Dai ning 2022 ning hta she bai galaw lu ai re lam, Kutkai Buga Ramma Komiti ningtau lithkam sara Lahpawk Lum Ze tsun ai.

Sharin hpawng a yaw shada lam hpe sara Lahpawk Lum Ze matut tsun ai hta, (1) Ramma ni kahkyin gumdin lam (2), Madu myit hte dawjau chye ai ramma (3), Hka lup makam hta mahta let buga hpung sasana magam bungli ni hta shang tsap lit la chye wa na matu re nga tsun ai.

Ginhtawng chyum sharin hpawng hta Namhkam ေက်းဇူးေတာ္ေဘာ္ဒါ kaw na laika sharin sara/num marai 7, Nawai Buga na ramma marai 15 hte Kutkai Buga na ramma marai 119 yawng marai 141 sharin hkamla nga ai re hte April shata 13 ya shani manam zup ai rai nna, April shata 17 ya shani manam bra na re lam chye lu ai.