Gumshem Myen hpyen dap hte KPDF hpyen hpung ni gasat gala majan byin

Katar Chyaung Wa kaw nna, Min Chyawng Kung maga de shamu shamawt hkawm ai, gumshem Myen hpyen dap Hk.M.Y 415) dap na n gun 40 daram re ai hpyen hpung ni hpe KPDF hpyen hpung ni, April shata 22 ya shana hkying 7 chyen aten daram hta gasat gala majan byin ai lam chye lu ai.

Gasat gala majan hta gumshem Myen hpyen maga na si, hkala hkrum ai lam nga ai raitim, marai kade re hpe gaw tup hkrak n chye lu shi ai re.

Gumshem Myen hpyen ni gaw, Jinghpaw mung hte Mungmyit Sinli Ga, Kachin Sub-state ginra hta hpyen n gun, hpyen lang arung arai hte malu masha ni hpe ding yang ngu na htaw shalai nga ai hta KIA, KPDF hpyen hpung ni hte jahkring hkring gasat poi byin nga ai re.

Lai wa sai April shata 13 ya shani hta mung, Shwe Gu kawn Mali Hka hku hkan nna, Chyauk Gyi de lung wa ai, gumshem Myen hpyen dap a hpyen lang arung arai hte malu masha htaw ai Jak li langai hpe KPDF hpyen hpung ni hkap gap gasat ai lam nga ai hpe mung chye lu ai.