Shawng nnan lang Palana Jau Ginwang Ramma ginsup shingjawng poi galaw

Photo Credit, RVA Kachin

Myitkyina Sasana, Palana Jau Ginwang, Ginjaw ramma committee ni woi awn galaw ai ramma ni a shawng nnan lang na Jau Ginwang madang ginsup shingjawng poi lamang hpe Palana Clay Center kaw April shata 22 ya shani kaw nna, 24 ya shani du hkra galaw sa wa na re lam chye lu ai.

Ginsup poi hpawng lamang hpe Ginwang Up Wa Jau Noel Naw Lat kawn shaman nna hpaw hpang sa wa ai lam chye lu ai.

Ginsup poi galaw ai a yaw shada lam gaw, ramma ni ka-ni nanghpam kaw na tawt lai lu na matu, hkam kaja zet let ai ramma ni byin tai na matu, ginsup ninghkring ni law law paw pru wa na matu hte ramma ni grau nna hku hkau zinlum lam lu nna, makam masham lam hta grau ap nawng lu na matu re lam RVA Kachin nsen shapoi dap kaw na chye lu ai.

Ndai zawn ginsup poi byin tai wa lu na matu, hpaji jaw la ai Ginwang Up Wa Jau hte sara/num ni, hpung masha ni, alu ja gumhpraw hte garum madi shadaw la sai chyeju madu ni, ginsup shang lawm ai sara gaiwang shagu na ramma ni yang hpe Jau ginwang ramma committee kaw nna chyeju dum kyu hpyi garum ya ai lam chye lu ai.