Hpara shachyaw shadun ai hpe Wunpawng ramma ni ninghkap
Wunpawng myusha ni a labau shang shara langai rai nga ai Nhkai Bum hta bukda makam masham hkrang bung sumla hpara galaw shadun nga ai hpe Wunpawng ramma ni tsep kawp ninghkap ai lam chye lu ai.
Ndai hkrang bung sumla hpara galaw shachyaw ai lam hpe NLD Asuya lak htak kawn, n galaw na hku tsun jahkrup da ai raitim, matut ding yang galaw nga ai re lam chye lu ai.
Wunpawng ramma langai tsun ai hta Nhkai bum ngu ai gaw anhte Wunpawng myusha ni a manu daw dan nlu ai shara re, ya na zawn hpara galaw ai lam hpe tsep kawp ning hkap ai. Bukda makam masham hpe roi nna tsun ai nre, ndai gaw Wunpawng myusha ni a labau shang ai shara hpe da sang bukda makam masham hpe tsun jahpai let, jahten sharun maw ai lam re ngu mu mada ai nga nna tsun ai.
Jinghpaw Htunghkying hte Laili Laika Hpung Ginjaw kaw nna, ndai lam hte seng nna, ninghkap ai lam ndau laika shapraw da ai raitim, matut galaw nga ai rai nna, ndai hkrang bung sumla hpara gaw tsaw de pe 27 tsaw ai lam chye lu ai.
Nnan galaw hpang wa ai kaw nna Wunpawng myusha ramma ni ninghkap nga ai 2 ning maga de du wa sai hte Nhkai Bum kaw n galaw ai sha kaga shara de galaw na matu, ning hkap nga ai lam chye lu ai.
