Mai Ja Yang Jau Ginwang ningnan shaman hpaw poi galaw

Sinpraw Ginwang Ginjaw, Mai Ja Yang Jau ginwang ningnan shaman hpaw poi hpe May shata praw 3 ya shani Mai Ja Yang Muklum San Pio nawku jawng wang hta galaw la lu sai lam chye lu ai.

Jahpawt hkying 7:00am aten hta Wa Sara Daw hte Jau Ginwang Up Wa Jau Paul Lahpai Awng Dang hpe hkaptau ai lamang galaw nhtawm, shaman pan grang rep ai lamang galaw ai, hkying 8:00am aten hta Misa hkungga galaw nhtawm, hkying 11:00am aten kaw nna, Jau Ginwang ningnan shaman hpaw poi galaw ai.

Shawng daw hta Pang Hkak Jau Ginwang rai nna, Mai Ja Yang grup yin de nga ai hpung masha ni Pang Hkak Jau Ginwang, Loi Je de sa na matu, yakhkak dut dang ai lam ni law law nga ai majaw, myit su ai kanu kawa hpung masha ni myit hkrum bawng ban jahkrum nna, Wa Jau Paul Lahpai Awng Dang woi awn let, hpaw wa ai re lam chye lu ai.

Jau Ginwang hpaw poi hta Wa Saradaw Raymond Sumlut Gam, Wa Saradaw France Daw Tang, Jau Ginwang de na Wa Jau ni, Mama ni tara hkaw sara/ num ni hte nawku hpung masha ni sa du shang lawm ai lam chye lu ai.

Mai Ja Yang muklum kata hta hkahtaw lik nawku hpung masha htinggaw 150 jan nga ai rai nna, Mai Ja Yang Jau Ginwang kata hta Son Joseph sara ninghtawn, Son Luka sara ninghtawn hte Son Pio Sara ninghtawn ni nga ai re lam chye lu ai.

Photo Credit; Naiding Seng Nu Pan