Dawjau na matu jin jin rai nga ga ngu ai ga baw hte ramma hpawng ginchyum sharin nga

Je Yang (IDPs) hkristan hkalup hpung KBC nawku hpung kaw nna, woi awn galaw ai, dawjau na matu jin jin rai nga ga ngu ai ramma camp hpe May shata praw 2 ya shani hpaw hpang nhtawm, praw 5 ya shani ginchyum dat sharin nga ai.

Yaw shada lam hpe Je Yang hkristan hkalup hpung KBC ramma hpaawn, Sara Nzing La Awng tsun ai hta

“Dai ni na grai rawt jat wa sai ahkying aten hta anhte nawku hpung kata hta anhte ramma ni ap nawng daw jau ai lam hpe grai rai na maga mi de shabri shabrai hpe sawn wa ai zawn zawn re lam ni, nawku hpung ni hta ap nawng daw jau ai lam, arang bang ai lam hta gawng kya ningra mat wa ai lam ni hpe mu lu ai majaw re” nga nna tsun ai.

Yakhkak ai lam law law nga ai hta anhte ramma ni hpe grai rai na aten jaw ra ai ahkying aten re, masha law law hte galaw sa wa ai lam hta tang du ai lam nau nnga ai raitim, ya na zawn masha nau nlaw ai hte sharin ai gaw tang du ai lam hpe lu la ai nga nna sara matut tsun ai.

Ginhtawng ramma camp hpaw sharin ai hta KBC ga baw rai nga ai hkrit shadu hta myu hte mungdan hpe gaw gap ga ngu ai hta anhte ramma ni gara hku na daw jau na, gara hku nga ra ai, gara hku hkyen lajang shang lawm na, KBC ramma langai a magam lit hte photo graphy ga baw ni hte sharin sa wa ai re lam chye lu ai.

Sharin hpawng hta Laiza buga hpung, Hpunlum Yang, Mungseng Yang, Je Yang Dabang hkan na ramma ni sa du shang lawm nna, ramma yang marai 162 re lam chye lu ai.

Lai wa sai ten hta Je Yang KBC nawku hpung hku galaw ai ramma camp ni nga ai, jarit mayan ramma komiti ni hku nna woi awng galaw ai lam ni mung nga ai hta bai du na shaning ni hta mung galaw na lam nga ai hpe chye lu ai.