Mungmyit Sinli Ramma Hpung a hkrumzup bawngban hpawng hte magam lit galai ap lamang galaw

Mungmyit Sinli Ga (Kachin Sub-state), Mungmyit Sinli Ramma Hpung a hkrumzup bawngban hpawng hte magam lit galai ap lamang hpe, May shata 13 hte 14 lahkawng ya, Wunpawng Laili Laika Hte Htunghking Ginjaw Rung hta galaw la lu sai lam chye lu ai.

Hkrumzup bawngban ramma hpawng a yaw shada lam hte galaw sa wa na masing ni hpe Mungmyit Sinli Ramma Hpung Ningbaw Sara Shekoi Dau Ze kaw nna, ya na zawn tsun ai.

“(1) Bungli masing ni gaw (15) ning gran da ai hpe hkrang shapraw na matu bawngban la lu ai. (2) Ramma atsam gawgap sharin hpawng lamang galaw sa wa na. (Myusha hte seng ai hkridun shamu shamawt lamang ni galaw sa wa na hku hkyen da ai. Ndai Ramma hpawng a madung yaw shada lam gaw, Mungmyit Sinli Ga nga Wunpawng Ramma ni myusha magam bungli lamang hta kahkyin gumdin let galaw sa chye wa na matu, Mungmyit Sinli Ga nga Wunpawng Ramma ni myit hkrum lam gawgap nna shada mahkri shawn let nga pra chye na matu re”

Mungmyit Sinli Ramma Hpung a 2019-2021 term hta mu gun lai wa ai ni gaw, shadang Hkangda Naw Mai ( Ningbaw ), Sara Shekoi Dau Ze (Ningtau Ningbaw), Shayi Bamwaw Zawng Seng Hpyu ( Ningtau Ningbaw -I ), Shadang Hpauyu Sha Roi ( Amu Madu ), Shadang Laha Zuk Htun ( Ningtau Amu Madu ), Shayi Myitung Htoi Nu Awng ( Kunhting ) hte Shayi Nhkum Ja Zin Pan ( Jahpan Jum ) ni re lam chye lu ai.

2022-2024 term hta matut mu gun sa wa na ni gaw, Sara Shekoi Dau Ze ( Ningbaw ), Shadang Laha Zuk Htun ( Ningtau Ningbaw ), Shadang Lashi La De Bu ( Amu Madu ), Shadang Hpakawn Zau Htoi ( Ningtau Amu Madu ), Shayi Kareng Seng Hkawn ( Kunhting ), Shayi Myitung Htoi Nu Awng ( Jahpan Jum ), hpaji jaw marai (5) hte komiti malawm ni gaw ginra (3) na Ramma Komiti Ningbaw, Amu Madu ni re hpe chye lu ai.

Hpawng hta Mungmyit Sinli Rapdaw na salang ni hte ginra masum rai nga ai, Muse ginra, Kutkai ginra hte Lashio ginra na ramma ni yawng marai (30) sa du dung lawm ai lam, Mungmyit Sinli Ramma Hpung Komiti kaw na chye lu ai.