Shingra maka hte makau grupyin masat nhtoi a matu hpun hkai ai lam galaw

Shingra maka hte makau grupyin masat nhtoi a matu, hpun hkai ai lam hpe Wunpawng Mungdan Shanglawt Asuya, Wunpawng Mungdan Shanglawt Kongsi Ningbaw Malai, hpaji jaw ai hte Magam Dap, Makan Dap hte wuhpung wuhpawng shagu na pawng hpawm let, June shata praw 4 ya shani Laiza, Mung Seng Yang mare grupyin hta hpun hkai ai lam galaw la lu sai re.

Hpun hkai ai lam a yaw shada lam hpe Sara Kaba Kareng Brang Seng (Wunpawng Mungdan Shanglawt Asuya Hkairem Magam Dap Lit Hkam, Lahta Tsang Hkairem Jawng Jawng Up) tsun ai hta “Anhte ra ai hta jan na nkran na, nra ai hpe majoi nkran kau na, hkang zing na, shaning shagu hkai aten du ai shaloi namsi hpun nnga, shingra nam maling hpun ni hkai rai jang gaw, anhte a shingra grupyin rap ra tsawm htap na, ngwi pyaw simsa ai mungdaw mungdan hpe anhte gaw de lu na re ngu, mu mada pandung tawn ai lam re” nga tsun ai.

Ndai yinam marang htu ai aten hka njaw ra hkra, June shata praw hpe masat la nhtawm, shaning shagu anhte Wunpawng amyu sha marai mi nlaw htum hpun langai hkai yang gaw kade nna ai kaw anhte a mungdan tsin lali tsawm htap wa na re nga, Sara Kaba tsun ai.

Dai ni hkai ai hta nampu nampan hpun, samsi namsaw, kaga hpun hpan amyu yawng 31 rai nna, hpun bawng yawng 2000 jan re ai hte Magam Dap, Makan Dap shagu na magam gun ni, wuhpung wuhpawng shagu na magam gun ni hte mungmare masha ni yawng marai 300 daram sa du shang lawm ai lam chye lu ai.

Ya na zawn hpung hkai ai lam hpe lai wa sai shaning hta mung galaw ai rai nna, matut nna mung ding yang galaw sa wa na lam chye lu ai.