Hpyen yen 11 ning ladu hkrum kyuhpyi hpawng galaw
Hpyen yen tsin yam hkrum ai shaning 11 ning hpring ladu hkrum kyuhpyi hpawng hpe June shata praw 9 ya shani hkying 10:00am aten hta Je Yang hpyen yen dabang, Je Yang Nawku Htingnu kaw galaw ai.
Je Yang hpyen yen dabang lawk (4-B) kaw nga ai Jan. Tangbau Lu Ja tsun ai hta “An dwi hkrai sha nga ai majaw masha ni matsan dum ai ni alap agyap hta jaw re dan re sha jai sha na nga ai, dinghku sharai la ra lam mung nnga ai, gumhpraw tam na nye kasha mung hpyenla rai mat, nye kashu hpe ngai she bau maka ai, nye kasha gaw kanu ngu ganing re nsam re pi nchye ai kawa gaw kalang lang sha yu wa ai gaw maning moi ning hkan ngai kawoi dwi hpe adwi ngai wa hte hpa baw daw a ta nga san wa kanu yan kawa a tsawra myit nlu la mat ai majaw rai na re.
Ja gumhpraw tam nga tim atung gaw gumgai sai sak kaba sai, dai ni du hkra garum matum ngu nmu ga, dawn jan yakhkak ai ni hpe garum ai ngu moi ning 2019 ning myu shayi ni garum ai gumhpraw 160000 kyast sha naw re, nye dingla wa machyi nga yang dabang rung, lawk salang rung na madi shadaw laika la na nye kasha hpe pru na matu wa tsun ai raitim nlu ai, ngai mung hkamja lam nnga chyaw kat machyi ai, an dwi a matu gaw hpa myit tim dut dang ai zawn nga ai, kadai kaw garum hpyi na mung a gam ai zawn zawn nga, hkrit ai zawn zawn nga ai, karai kasang gaw an dwi zawn re gaida gaina matsan shayen re wa lani mi gaw shalawt la na re ngu kyu sha hpyi ai”nga tsun ai.
Hpyen yen lakawn lanawn Ginjaw Komiti Ningbaw Dukaba Lama Zau Raw tsun ai hta “11 ning ladu hkrum ai hta anhte amyu sha ni hkap ja lam hte seng nna chye na ai ni grai nga wa sai, ta tut hkan sa ai ni grai law wa sai, jawng lung ai ma ni grai law sai, janmau lu ai ma ni grai law sai, jawng nlu lung ai ma nnga sai, nkam lung na nlung ai ni sha nga na re, yak nna nlung ai jawng nnga na nlung ai ngu gaw nnga sai, dai ni anhte ma ni hpaji lam hta shaning shi ning laman tsawm ra rawt jat wa sai hku na mu mada ai, hpyen yen ladaw hta lam shagu hta ram ram rawt jat galai shai wa saga ai, hpyen yen yen na anhte yawng grai hkrat sum mat sai ngu na nkau mi dai hku chyu myit nga na re, gaja wa maga mi hku na anhte gaw ganing rai galai shai ai, gara hku rawt jat ai lam nga ai hpe bai myit wa yu ai shaloi ndai ni gaw ram ram anhte hta n-gun la shara ni re” nga tsun ai.
Hpyen yen tsin yam hkrum ai shaning 11 ning hpring ladu hkrum ai kyuhpyi hpawng lamang hpe Je Yang (IDPs), Hpunlum Yang (IDPs), Woi Chyai (IDPs) kaw galaw ai hta KBC ginjaw magam gun ni, seng ang ai hpung woi sara ni hte ginjaw salang ni sa du shang lawm ai rai nna, masat dingsat hku nna, sumla madun gawk hpaw let sumla madun ai lam ni hpe mung galaw ai.
