KIA Masat 1 Dap Ba, Masat 2 Dap Ba hte Masat 9 Dap Ba ginra ni hta gumshem Myen hpyen ni hte KIA ni gasat gala majan byin
KIA Masat 1 Dap Ba, Masat 2 Dap Ba hte Masat 9 Dap Ba ginra ni hta gumshem Myen hpyen dap hte KIA ni June shata 10 ya shani hta gasat gala majan byin ai lam na chye lu ai re.
KIA Masat 1 Dap Ba ginra, Sumpra Bum maga na yu wa ai gumshem Myen hpyen dap hte Pyi Tu Tsit pawng hpawm hpyen hpung ni KIA hpyen hpung ni nga ai shara de, shamu shamawt shang wa ai majaw, dai hpawt hkying 5:00am jan aten hta Za Nan Hka mahkrai pawt kaw KIA ni hkap shingla gasat dat ai kawn gasat poi byin ai lam chye lu ai.
KIA Masat 2 Dap Ba ginra, Lido lam hku nna, Kawng Ra Mare maga de shamu shamawt htu shang wa ai, gumshem Myen hpyen dap Hk.L.Y 86 dap hte Hk.M.Y 390 dap na pawng hpawm hpyen n gun 100 daram re ai hpyen hpung ni hpe dai hpawt hkying 6:40am aten hta KIA hpyen hpung ni, Nam Hpyek Mare baw kaw bawm hte hkap shingla gasat dat ai lam nga ai.
Bawm hte hkap gasat hkrum ai hpang, gumshem Myen hpyen ni gaw makau grup yin shara ni de, laknak kaji kaba hte hkrup mara gap shadam bun ai sha n ga, lai wa lai sa mungmasha ni a modo, cycle ni hpe hkap jahkring kau ya ai lam mung nga ai re.
Dai ni June shata 10 shani hta sha, KIA Masat 9 Dap Ba ginra hta shamu shamawt chyinglau hkawm ai, gumshem Myen hpyen dap Hk.L.Y 42 dap hte Hk.M.Y 111 pawng hpawm hpyen hpung ni hpe Mai Nawng Ja Maw mayan kaw KIA hpyen hpung ni hkap shingla gasat da tai kawn gasat poi byin ai lam chye lu ai.
