KIA Masat (2) Dap Ba ginra hte Masat (4) Dap Ba ginra ni hta gasat gala majan byin
KIA Masat (2) Dap Ba, Masat (11) Dap Dung ginra, Tanghpre Mare hte Chyinghkrang Mare lapran kaw, June shata 18 ya jahpawt hkying 7:10am aten hta gumshem Myen hpyen modo hpung ni hpe KIA hte KPDF pawng hpawm hpyen hpung ni hkap shingla gasat ai lam chye lu ai.
Ndai gumshem Myen hpyen modo 70 daram hpung ni gaw, Putao maga na yu wa ai ni rai nna, KIA hte KPDF ni bawm hte hkap shingla gasat dat ai re. Ndai zawn hkap gap gasat ai hta gumshem Myen hpyen ni machyi hkrum ai majaw, makau grup yin shara ni de laknak kaji kaba gap bun ai lam chye lu ai.
Gumshem Myen hpyen dap ni, hpyen n gun jat ai lam, hpyen lang arung arai hte malu masha htaw shalai ai lam ding yang ngu na galaw nga ai majaw, Putao, Sumpra Bum, Tayang Zup hte Njang Yang lam mayan ni hta KIA ni hkap shingla gasat ai lam nga ai re.
Mungmyit Sinli Ga (Kachin Sub-state) KIA Masat (4) Dap Ba, Masat (8) Dap Dung ginra hta mung, June shata 15 hte 16 lahkawng ya ngu na, gumshem Myen hpyen hpung ni hte KIA ni gasat gala majan byin ai lam, shawng lam na lit nga ai salang ni tsun ai kaw na chye lu ai.
