Jinghpaw Wunpawng a akri laidung ramma sharin hpawng galaw
Photo Credit, JHG News Kachin State
Jinghpaw Wunpawng Htunghking hte Laili Laika Hpung Ginjaw (JHG), ramma magam dap kaw nna, woi awn galaw ai ramma ni hpe Jinghpaw Wunpawng a akri laidung sharin hpaw hpe June shata 23,24 ya laman, jahpawt hkying 9:00am kawn, shana hkying 3:00pm du hkra galaw sa wa na re lam chye lu ai.
Sharin hpawng a yaw shada lam hpe JHG Ramma Ningbaw Sara Lahkrang Hkun Maw tsun ai hta “Prat dep ai machyoi hpaji ni hpe gaw anhte chye wa magang sai, dai kata hta mung anhte rawt jat wa rai raitim mung, anhte ndai Jinghpaw Wunpawng ramma ni grau nna, anhte a htung tara htunghking kri hpe e chye na hkawn hkrang nna, grau nna ndai lam hta anhte rawt jat galu kaba sa wa lu na matu ngu yaw shada lam re” nga tsun ai.
Sharin hpawng hpe Myitkyina, Shata Pru lawk, JHG rung wang hta galaw sa wa na re lam chye lu ai.
Ndai sharin hpawng saw shaga ai lam hta masat da ai lam nga ai rai nna, asak 20 ning hpring ra na, ngut du hkra lu lawm sharin hkam la ra na hte ramma marai 30 hpe sha hkap la sharin sa wa re lam chye lu ai.
