Mungkan Ka-ni nanghpam ninghkap masat ninghtoi hpawng galaw
Mungkan Ka-ni nanghpam ninghkap masat ninghtoi hpawng hpe June shata 26 ya shani hkying 7:00am aten, Sinpraw Majoi Manau Gawknu kaw galaw ai.
Hpa majaw galaw ra ai ngu ai yaw shada lam hpe Ninggawn Daju Komiti Shingtau Tingnyang Up-2, Du Up Jum Lahpai Hing Wawm tsun ai hta “Mungkan mungdan law malawng hta ka-ni hkai galaw shapraw ai lam n nga ai, ka-ni nhkai n pru ai mungdan ni raitim ka-ni lu lang ai masha law wa ai, ka-ni lu lang ai gaw masha a matu akyu n nga ai hte gumhpraw law law jai lang lahpawt kau lu ai, ka-ni nanghpam lu lang ai majaw masha ni a akyang lai len hten za ai hte hkamja lam hkrat sum wuhpung wuhpawng dinghku ni hten rum mat hkrum ai, mungdan a simsa rawt jat rawt galu kaba lam hpe hkrat sum shangun ai” nga nna tsun ai.
Hpawng lamang hpe Sinpraw Majoi Manau Gawknu, Laiza lahta tsang Jawng Gawknu, Woi Chyai Hpyen Yen Dabang, Dai Lawn Rung, Alen Bum (DGA hpungwa gawknu), Masat (1) Dap Nawng Daju, Masat (2) Dap Nawng Daju, Ginjaw Dabang (Lai sin bum), Masat (1) Laknak Kaba Dap Ba hte Ginjaw Hkamja Da ni hta galaw ai lam chye lu ai.
2021 ning June shata kaw na 2022 ning June shata du hkra Ninggawn Daju Ka-ni Nanghpam Pat Jasan Komiti hku nna, nanghpam lu sha, dut mari ginlen ai masha ni hpe rim ahkyak la sa wa ai hta La marai 7, Num marai 8, Yama tawng 150 hte Ka-ni hpraw sappya kawk 11 jan lu rim zing la sai lam chye lu ai.
