Masat yan (15) Balik jawng yu hpawng galaw

Wunpawng Mungdan Shanglawt Asuya, Ginjaw Balik Dap kaw nna hpaw sharin ai masat yan (15) Balik jawng yu hpawng hpe, June shata 28 ya jahpawt hkying 7:00am aten hta Ning Awn Gawknu hta galaw la lu sai lam chye lu ai.

Masat yan (15) Balik Jawng, jawng yu ai jawngma ni gaw, La marai (103) Num marai (21) yawng marai (124) re lam chye lu ai.

Hpawng lamang hta jawng yu lakmat shagrau ai lam, ningtawn kumhpa shagrau ngut ai hpang, Du Up Sumlut La Nu (Ginjaw Balik Dap Ningtau Matsun Du) kaw nna magam aming hti ndau ai lam hpe galaw ai.

Salang Kaba Nhkum Gam Awng (Mungchying Uphkang Dap, Ningtau Lithkam) kaw nna jawng yu shatsam mungga jaw ya ai lam chye lu ai.

Masat yan (15) Balik jawng hta sharin hkamla ai ni gaw, Ginjaw Balik Dap, Laiza Muklum Balik Dap, Ginjaw Ginra Ginwang Ginjaw Balik Dap, Sinpraw Ginwang Ginjaw Balik Dap, Sinna Ginwang Ginjaw Balik Dap, Dingdung Ginwang Ginjaw Balik Dap, Dingda Ginwang Ginjaw Balik Dap, Uru Ginwang Ginjaw Balik Dap, Mai Ja Yang Balik Dap hte Lana Zup Ja Balik Dap na magam gun ni sa du sharin hkamla ai lam chye lu ai.

Masat yan (15) Balik Jawng hpe 2022 ning March shata praw kaw nna hpaw sharin hpang ai hta ninghtoi (120) ya sharin ya ai re hpe mung chye lu ai.

Jawng yu hpawng hta Magam Dap, Makan Dap na lit nga ai salang ni, hpawng woi sara ni hte jawngma kanu kawa ni sa du shanglawm ai lam chye lu ai.