Nazareth Futsat Ground Ning-gang gashun gawdin ginsup shingjawng lamang galaw

Laiza Muklum, Laiza Jau Ginwang kawn, woi awn galaw ai, St.Peter hte St.Paul a poi masat hku na Futsal gawdin ginsup poi hpe June shata 20 ya shani kaw nna ginsup hpang nhtawm, 29 ya shani ning-gang gashun ginsup lamang galaw ai.

Ning-gang kashun lamang hta gawdin hpung (35) rai nna, la gawdin hpung (29), num gawdin hpung (6) re lam chye lu ai.

Yaw shada lam hpe Laiza Jau Ginwang Mungbawng Ningbaw Salang Ningru Naw Ut tsun ai hta “Ramma ni, jawng ma ni, asak ram ai ramma ni, sak kung ni, bai nna makam masham n ging hka ai wuhpung wuhpawng ni yawng ndai kaw ginsup lu na matu, ginsup ai marang e langai hte langai mahkri shawn lu ai, langai hte langai jinghku hku wa ai, hkau chyap wa ai, ndai zawn re ai akyu ni hpe e law law hkam la lu ai hku re” nga nna tsun ai.

Ginsup lamang hta ning-gang masat lu mat ai gawdin hpung ni gaw, la ginsup hpun de na Sut Madu No. (1), Laiza United No. (2), Laiza Pub No. (3) rai nhtawm, num ginsup hpung de na, Laiza United(B) No. (1), Laiza United(A) No. (2) hte Nazarth No. (3) ni lu mat ai re.

Ning-gang gashun gawdin ginsup lamang hpe Wa Jau ni Ma Ma ni hte mung shawa kanu kawa, ramma ni yawng sa du yu n gun jaw ai hte galaw la lu sai lam chye lu ai.