Gumshem Myen hpyen ni sinat kaba hkrup mara gap bun ai majaw, mungshawa modo langai hten mat
Hpakant lam Nam Ya Mare kaw dap jung ai gumshem Myen hpyen Hk.L.Y (12) dap ni, July shata praw 3 ya laban shani ka-ang hkying 11:58pm aten daram hta sinat kaba hkrup mara gap shadam bun ai majaw, mungshawa modo langai hten hkrum mat ai lam chye lu ai.
80mm ngu maram ai sinat kaba si gaw, Seng Hpra Mare Sabaw Maw sa lam makau na U Aung Zaw Oo a dum nta wang kaw wa hkrat kapaw ai hta mungshawa masha hkra ai lam nnga ai raitim, 4-whell modo langai hten hkrum mat ai lam chye lu ai.
Gasat gala majan byin ai lam nnga ai raitim, Nam Ya kaw dap jung ai gumshem Myen hpyen ni ya na zawn sinat kaba hkrup mara gap shadam bun ai majaw, lai wa sai aten hkan mungshawa nta hten hkrum ai sha n ga, mungmasha hkra hkala ai lam ni mung byin lai sai re.
Ndai zawn sinat kaba hkrum mara gap shadam bun ai majaw, mare masha ni hkrit tsang nga ai hte lai wa lai sa mungshawa ni hpe mung, gumshem Myen hpyen dap hte Pyi Tu Tsit ni pawng hpawm nhtawm, azin ayang sawk jep ai lam galaw nga ai hpe ginra masha ni tsun ai.
Kamaing Mare kaw mung, May shata kaw nna mare kata hkawm sa hkawm wa mungmasha ni hpe gumshem Myen hpyen dap hte Pyi Tu Tsit ni sawk jep ai lam jahkring hkring galaw nga ai hpe mung chye lu ai.
