Dai ni laika hti ai ramma hpawt ni na ningbaw ningla ga baw hte laili laika hkaw tsun hpawng galaw

Dai ni laika hti ai ramma hpawt ni na ningbaw ningla ngu ai ga baw hte laili laika hkaw tsun hpawng hpe July shata praw 9 ya shani hkying 1:00pm aten kawn hkying 6:00pm aten du hkra Ginjaw Hkamja Dap, Wunjat Gawknu hta galaw ai.

Hkaw tsun hpawng a yaw shada lam hpe Sara Kaba Lapyaw Hkawng Ze tsun ai hta “Hpaji myi lu na matu gaw anhte ni galoi mung matut manoi hkaja ai lam hpe anhte ni galaw ra ai. Ndai lam ni hpe lu la na matu gaw laili laika hta sha madung re. laika hti ai a marang e tinang a prat, hkum tinang makam nga wa lu na matu re, anhte a myit masin ni gawng run mat wa ai ahkying aten ni hpe bai gaw gap la lu na matu gaw laika buk kaw na sha re, laika kaw na sha anhte myit masin ni hpe nam hpun ni jaw bang ya na re ngu yaw shada let byin wa ai lam re” nga tsun ai.

Hkaw tsun hpawng hta sharin sara hku na Htunghkying hte Laili Laika Magam Dap a Lit hkam Salang Kaba Chyana Zau Awn, Sara Kaba Zinghang Gam Htun hte Sara Kaba Lapyaw Hkawng Ze sharin ya ai.

Ndai sharin hpawng hta Ginjaw hkamja dap na tsi sara/ saranum ni hte tsi sara wun magam gun ni yawng marai 424 jan sa du sharin hkam la ai lam chye lu ai.

Lai wa sai ten hta mung laili laika hkaw tsun hpawng hpe Sinpraw Majoi Manau Gawknu kaw 2 lang, Alen Bum Lahta tsang jawng kaw 1 lang, Laiza lahta tsang jawng kaw 1 lang galaw lai wa sai rai nna, matut na mung galaw sa wa na lam chye lu ai.