Nam Hpalun hte Hpa Hkyip lapran kaw gasat gala majan byin

Mungmyit Sinli Ga (Kachin Sub-state) KIA Masat (6) Dap Ba, Masat (9) Dap Dung ginra, Nam Hpalun hte Hpa Hkyip lapran kaw July shata 15 ya shani gumshem Myen hpyen ni hte KIA ni gasat gala majan byin ai lam chye lu ai.

“Myen hpyen dap gaw, Hk.L.Y (290) dap ngu maram ai hpyen n gun 50 daram hpung ni re, anhte ni nga ai shara de, shamu shamawt sa wa ai majaw, dai ni hkying 1:26pm aten kaw nna, hkying 1:45pm aten du hkra gasat poi byin ai” nga nna shawng lam na lit nga ai salang langai tsun dan ai.

Myen hpyen ni htingnut mat ai lam nnga yang gasat poi gaw, matut nna naw mai byin wa ai lam, salang wa tsun ai kaw na chye lu ai.