KIA Masat (2) Dap Ba, Masat (5) Dap Ba hte Masat (9) Dap Ba ginra hta laja lana gasat gala majan byin

KIA Masat (2) Dap Ba, Masat (14) Dap Dung ginra, Kanoi Tu  maga de shamu shamawt tawt lai shang ai wa gumshem Myen hpyen dap, Pyi Tu Tsit pawng hpawm dap ni hte KIA ni July shata 18 ya jahpawt hkying 4:00am aten hta gasat gala majan byin ai lam chye lu ai.

Gumshem Myen hpyen dap hte Jahtu Zup kaw shara jahkrat nga ai Pyi Tu Tsit pawng hpawm hpyen hpung ni, KIA hpyen hpung ni shara jahkrat nga ai shawnglam post hpe sa htim gap ai kawn gasat poi byin ai lam chye lu ai.

KIA Masat (5) Dap Ba, Masat (3) Dap Dung ginra, Nang Zaw Yang makau kaw July shata 18 ya shana maga hkying 3:00pm aten daram hta gumshem Myen hpyen dap hte Pyi Tu Tsit pawng hpyen hpung ni KIA hpyen hpung ni nga ai shara de, htu shadut shang wa ai majaw, gasat poi byin ai lam ginra masha ni kaw na chye lu ai.

Nang Zaw Yang mare makau na KIA ni shara jahkrat nga ai post maga de, July shata 10 ya shani kaw nna, gumshem Myen hpyen dap hte Shwe Min woi ai Pyi Tu Tsit pawng hpawm hpyen hpung ni htu shadut shang wa ai majaw, gasat gala majan byin ai hta gumshem Myen hpyen dap ni Helicopter nbungli ni jai lang nhtawm, wa gap gasat ai lam ni nga ai re.

KIA Masat (9) Dap Ba, Masat (26) Dap Dung ginra, Sezin mare baw kaw mung, dai ni July shata 18 ya jahpawt hkying 6:15am aten kaw nna, gumshem Myen hpyen dap hte KIA ni gasat gala majan laja lana matut byin ai lam nga ai.

Ndai KIA Masat (26) Dap Dung ginra, Sezin mare makau kaw July shata 16 ya shani kaw nna, gumshem Myen hpyen dap hte KIA ni laja lana gasat poi byin ai hta gumshem Myen hpyen maga na si hkala law ai majaw, Jet nbungli ni lahkawng hte bawm wa jahkrat gap bun ai lam chye lu ai.