Gumshem Myen hpyen dap hte KIA ni gasat gala majan matut byin
Gumshem Myen hpyen dap, Pyi Tu Tsit pawng hpawm hpyen ni gaw, KIA ni nga ai shara de hpyen shamu shamawt tawt lai shang wa ai majaw, July shata 10 ya shani kaw nna, shani shagu ngu na gasat gala majan byin nga ai re.
Dai ni July shata 20 ya shani hta mung, KIA Masat (9) Dap Ba, Masat (26) Dap Dung ginra, Sezin mare lahta de htu shadut shang wa ai gumshem Myen hpyen dap hte KIA ni gasat gala majan matut byin nga ai lam chye lu ai.
July shata 19 ya lani mi hta sha, Sezin Relay Kawng mayan hta jahpawt hkying 5:00am aten kaw nna, shana hkying 7:30pm aten du hkra, Jet nbungli hte bawm (13) lang wa jahkrat bun ai, Helicopter nbungli hte gaw hpyen n gun machyu pala sa ai lam, majan kaw si hkala hkrum ai masha ni hpe htaw lahka ai lam galaw ai hpe ginra shiga lawk kaw na chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra, Nam Gut Mare modo lam kaba kaw July shata 19 ya shana maga hkying 3:45pm aten kaw na hkying 4:10pm aten du hkra, gumshem Myen hpyen ni shamu shamawt lung wa ai majaw gasat poi byin ai re.
Gasat poi byin ai hpang, Kutkai kaw dap jung ai gumshem Myen hpyen Hk.L.Y (45) dap kaw nna gasat poi byin ai shara de, laknak kaba hte (5) lang gap bun ai majaw, Nam Gut Mare na Hpungtau La Wam, Jan Mahaw Roi Ji, Jan Nhkum Nang Din hte U Htun Chyaw (Balawng) ni a dum nta kaw pala hkyep wa hkra ai raitim, Masha hta hpa nra ai lam, sagawn chye lu ai.
