Loi Sam Sip (Bumsum Shi) lagaw pawt kaw gumshem Myen hpyen hte KIA ni gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung, Kung (1) ginra, Loi Sam Sip (Bumsum Shi) lagaw Hu Et lam numshe kaw July shata 25 ya jahpawt hkying 7:07am aten hta gumshem Myen hpyen ni hte KIA ni gasat gala majan byin ai lam chye lu ai.
“Myen hpyen dap gaw Hk.L.Y (45) kaw na ni hte re. Anhte nga ai shara de shamu shamawt shang wa ai majaw gasat poi byin ai re” nga nna shawng lam na lit nga ai salang langai tsun ai.
Gasat gala majan byin nga ai ten, Myen hpyen dap ni Man Nawng mare de sinat kaba gap bang ai majaw, asak 3 ning re Balawng (Ta-ang) Ma langai pala hkyep hkra nna, Lashio tsi rung de htaw yu wa ai hpang asak si sum mat ai lam, ginra masha ni kaw na chye lu ai.
Dai na hkying 8:21pm aten hta mung, Kutkai golf pa kaw rawng nga ai gumshem Myen hpyen ni hpe KIA ni sa htim gap gasat ai lam na chye lu ai.
Lai wa sai June shata 17 ya shani hta mung, gumshem Myen hpyen dap ni gap dat ai laknak kaba Galeng Zup Awng hpyen yen dabang kaw wa hkrat kapaw ai majaw, mungshawa marai lahkawng asak si sum ai lam mung byin sai re.
