Sezin mare makau na gumshem Myen hpyen dap hpe KIA ni sa htim gap gasat
KIA Masat (9) Dap Ba, Masat (26) Dap Dung ginra, Sezin kaw dap jung shara jahkrat nga ai, gumshem Myen hpyen dap hte Sezin Shwi Pyi Myint mayan hta nga ai SNA Pyi Tu Tsit ni a dap hpe, August shata praw 8 ya jahpawt hkying 1:07am aten hta KIA hpyen hpung ni sa htim gap gasat zing kau lu ai lam, shawng lam shiga lawk kaw na chye lu ai.
Jahpawt manap hkying 4:00am aten hta gumshem Myen hpyen dap hpe gasat hpya kau ai hte hpyen lang arung arai, sinat machyu pala ni hpe mung padang dip la lu ai lam nga ai re.
KIA Masat (26) Dap Dung, Sezin ginra ni hta gumshem Myen hpyen dap hte Pyi Tu Tsit pawng hpawm hpyen hpung ni KIA ni nga ai shara de, hpyen shamu shamawt tawt lai shang wa ai majaw, lai wa sai July shata hta gasat gala laja lana byin ai hta gumshem Myen hpyen dap ni Helicopter hte Jet nbungli ni jai lang nhtawm KIA ni hpe wa gap gasat ai lam byin sai re.
Ginsi Byuha Kawng kaw dung ai, gumshem Myen hpyen dap ni mung, August shata praw 8 ya jahpawt hkying 5:28am aten hta KIA ni nga ai Nam Jan maga de laknak kaba 120mm hte (8) lang gap bun ai lam chye lu ai.
KIA Masat (5) Dap Ba, Masat (3) Dap Dung ginra, Sadung Bum Byuha Kawng kaw nga ai, gumshem Myen hpyen dap ni mung, August shata praw 8 ya shana hkying 7:20pm aten hta Sana mare nnan hte Ding Gyi Krung maga de sinat kaba 81mm hte 4 lang gap shadam bun ai lam chye lu ai.
