International Youth Day hpawng lamang galaw

Je Yang hpyen yen dabang ramma komiti kaw nna, woi awn galaw ai International Youth Day hpawng lamang hpe August shata 12 ya jahpawt hkying 6:00am aten hta Je Yang dabang gin sup pa kaw galaw ai lam chye lu ai.

Youth Day lamang hta ninggang gashun ai hku nna, ginsup hpan law law gin sup ai hte galaw ai lam chye lu ai.

Lamang a yaw shada lam hpe Je Yang dabang ramma komiti ningbaw Sara Lahtaw San Awng tsun ai hta “Grau nna gaw ramma ni a myit hkrum lam, gahkyin gumdin lam, shada tsawra mahku mara lu na matu hte hpyen yen dabang kata nga ai nga yang gaw, myit htum myit ru myit yak ai lam amyu myu nga na re, ndai zawn re lapran kaw na anhte ni kachyi mi sha pyi hkoi san ai lam hpe lu la lu na matu, ramma ni a n-gun atsam hpe mung shapraw ai hku na, hkamja lam a matu mung rai sai lam magup hku na yaw shada let, ndai lamang hpe galaw sa wa ai lam rai ga ai” nga nna tsun ai.

Ndai hpawng lamang hta n-gun jaw shatsam mungga hku nna, Sarakaba Lapyaw Hkawng Ze tsun ai hta “Ningbaw ningla langai galaw wa na rai sa nga yang, ramma langai mi hta hpring zup ra ai akyang lai len ni nga ra na re, ningpawt n ngang ai sha ningbaw ningla hpu-awn ngu ai de du wa na matu yak na re, dai ni laika hti ai wa hpawt ni na ningba ningla, dai ni na sak hkrung hkawm sa lam hpe tinang akyu jashawn ai tinang a bawnu hpe e atsam marai bang ya ai namhpun bang ya ai bawng ring wa yang she, anhte a myit sawn sumru lam ni gaw rawt jat kung kyang wa lu na kalu kaba wa lu na re ai, rai yang she na a shamu shamawt ai lam hpe makau gyup yin ni yu nna nang hpe daw dan wa na re, dai shaloi nang hpe lit jaw wa ai nang hpe shatsam wa ai magam bungli gaw nang hpu-awn shara rai sai” nga tsun ai.

Youth Day lamang hpe Je Yang hpaji jawng ni hku nna mung galaw ai rai nna, Woi Chyai dabang ni kaw nna mung galaw ai lam chye lu ai.