(9) Lang na ningtawn jawngma kumhpa shagrau hpawng galaw
Alen Bum Jawng a (9) lang na ningtawn jawngma shagrau hpawng hpe August shata 16 ya shani hkying 10:00am aten, Alen Bum Jawng Gawknu kaw galaw ai.
2021-2022 ning hpaji ladaw hta dawn jan ginhpan hku na awng ai jawngma yawng marai 81 hpe ningtawn kumhpa shagrau ai lam galaw ai rai nna, dawn jan ginhpan pru mat wa ai ginhpan ni gaw Jinghpaw ginhpan hta marai (1), Englist ginhpan hta marai (23), Physics ginhpan hta marai (5), Chemistry ginhpan hta marai (36), Biology ginhpan hta marai (4), History ginhpan hta marai (2), Mathematics hta marai (46) rai nna, ningtawn ai hku awng mat wa sai lam chye lu ai.
Shagrau hpawng hta Ginjaw Hpaji Dap, Ningpawt Ninghpang Hpaji Matsun Du, Sarakaba Htawngga Yaw Sau kaw na hpaji hte seng ai magup sumhpa hpaji jaw ai hta “Rawt malan mi raitim mung, hpaji hpe gaw rawt malan nga ai ngu na ntawn da mai ai, ganing rai yak hkak nga ai raitim hpaji lam gaw hpaji lam, mai byin ai daram gaw anhte galaw woi awn nga ai re, hpaji dap kaw na mung, hpaji hpe mungkan a hpaji hkrunlam hta anhte mung hkawm lu hkra shakut wa nga ai” nga nna tsun ai.
Alen Bum Hpaji Jawng hpe 2013-2014 ning hpaji ladaw kawn hpaw sa wa ai rai nna, hpaji ladaw (9) ning laman tsang shi hpe htai awng mat wa sai jawngma yawng marai 1248 rai nna, 2022-2023 hpaji ladaw hta jawng lung nga ai jawngma yawng marai 2322 re lam chye lu ai.
Dai ni na zuphpawng gaw (9) lang na ningtawn jawngma kumhpa shagrau hpawng hte 2022-2023 ning hpaji ladaw, N0 (1) lang jawngma, Kanu Kawa, Sara manhkrum zuphpawng mung rai nna, du sa masha marai 900 jan re lam chye lu ai.
