Gumshem Myen hpyen dap ni sinat kaba hkrup mara gap bun nga ai sha n ga, lai wa lai sa mungshawa ni hpe sawk jep nga
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra, Namhpakka kaw shara jahkrat nga ai, gumshem Myen hpyen dap ni August shata 17 ya shani ka-ang hkying 12:18pm hte 1:00pm aten laman sinat kaba 60mm gap shadam bun ai lam chye lu ai.
“Laknak lang wuhpung kadai re n chye ai, Namhpakka Myen Balik Dap kaw ta bawm (1) hte sinat kaji (2) lang gap kapaw bun ai hpang, Myen Dap ni sinat kaba 60mm hte grup gra de (5) lang, grup gra de bai gap shadam bun ai” nga nna buga masha ni tsun ai.
KIA Masat (9) Dap Ba, Masat (44) Dap Dung ginra, Nam Ya kaw nga ai gumshem Myen hpyen dap ni mung, August shata 15 ya shana maga hkying 3:30pm aten hta Gumtsai Zup mare shingdu maga de sinat kaba 60mm hte (4) lang gap bun ai lam nga ai re.
Gumshem Myen hpyen dap na ndai zawn sinat kaba hkrup mara gap shadam bun ai majaw, mungshawa ni hta hkra hkala si, sum mat ai sha n-ga dum nta ni hten za hkrum mat ai lam ni mung byin ai re.
Dai ni August shata 18 ya jahpawt hkying 7:00am aten hta Danai Lidu lam Maran Kahtawng shagyit (Gate) kaw laiwa laisa mungmasha ni hpe, gumshem Myen hpyen la ni laja lana sawk jep nga ai lam, ginra masha ni kaw na chye lu ai.
