2022-2023 hpaji ladaw, no (1) lang na jawngma, kanu/wa ni hte sara/num ni a man hkrum zuphpawng hte ningtawn jawngma shagrau hpawng galaw

Wunpawng Mungdan Shanglawt Asuya, Laiza lapran tsang jawng a 2022-2023 hpaji ladaw, no (1) jawngma, kanu/wa ni hte sara/num ni a man hkrum zuphpawng hte ningtawn jawngma shagrau hpawng hpe, September shata praw 2 ya jahpawt hkying 9:00am aten hta Sinpraw Majoi Gawknu kaw galaw ai lam chye lu ai.

Saranum Kaba Lagang Ja Bu (Laiza Muklum Hpaji Du) kaw nna hpawng hpaw mungga tsun ai, jawng sumtang hpe saranum kaba Marip Ja Nem (Laiza Lapran Tsang Jawng Up) kaw nna, tang madun ai hpang jawngma kanu/wa komiti ni kaw nna mung sumtang hpe tang madun ai lam galaw ai re.

Hpawng a yaw shada lam hpe, Saranum Kaba Marip Ja Nem (Laiza Muklum Lapran Tsang Jawng Up), kaw nna ndai zawn tsun ai.

“Dai ni na lamang hta lai wa sai 2021-2022 ning hpaji ladaw na ningtawn ai jawngma ni hpe shagrau sha-a ai hpawng lamang ma rai mali ai. Dai ni na 2022-2023 ning hpaji ladaw hta jawng kata kaw galaw sa wa ai magam bungli ni hpe sumtang tang madun ai zuphpawng mung rai mali ai.

Anhte jawng kaw galaw taw nga ai magam bungli ni hpe kanu/wa ni hpang de chye shangun mayu ai, anhte galaw mat wa ai lam ni, jawng kata kaw jai lang ai ja gumhpraw ni, kanu/wa ni madi shadaw da ai ja gumhpraw ni nga ai, Mungdan Asuya kaw na madi shadaw da ai nga ai, NGO wuhpung wuhpawng kaw na madi shadaw da ai, jawngma lang, sara lang arung arai ni hpe e, kanu/wa ni hpe tang madun ai hte jawng a rawt jat galu kaba lam hta grau nna arang bang lawm na matu, shanglawm na matu yaw shada let galaw ai rai ga ai” nga nna tsun ai.

Saranum Kaba Lagang Ja Bu (Laiza Muklum Hpaji Du) kaw nna mung, Ginjaw Hpaji Dap a galaw nga ai magam bungli ni hpe ndai zawn tsun ai.

“Anhte Ginjaw Hpaji Dap hta galaw nga ai magam bungli ni hpe tsun dan mayu ai. Anhte Ginjaw Hpaji Dap hta (5) ning masing plan hpe galaw da ai hta ningpawt ninghpang hpaji, madang tsaw hpaji, kanbau hpaji, yu reng diklik ai lam hte shinggan wuhpung wuhpawng hte matut mahkai ai lam, gawgap gawsharawt lam ni hpe tatut galaw nga sai re, ndai masing ni hpe 2021 ning kaw na 2026 ning du hkra gran da ai hpe tatut hkrang shapraw galaw taw sai hku re” nga nna tsun ai.

Hpawng hta du sa ai jawngma kanu kawa ni, jawng saranum yawng marai 500 daram du sa ai rai nna, ndai zawn jawngma kanu/wa ni hte jawng komiti ni man hkrum zuphpawng hpe laning ni hta lahkawng lang galaw ai lam hpe mung chye lu ai.