Hkai rem hpaji sharin jawng hpaw sharin ai 25th ning hpring gumhpraw jubili chyeju shakawn hpawng galaw

Wunpawng Mungdan Shanglawt Asuya, Hkai Rem Magam Dap, Hkai Rem Hpaji Sharin Jawng hpaw ai 25^th ning hpring gumhpraw jubili chyeju shakawn hpawng hpe Alen Bum, Hkru Kat Gawknu kaw, September shata praw 3 ya jahpawt hkying 9:00am aten hta galaw ai lam chye lu ai.

Gumhpraw jubili chyeju shakawn hpawng galaw ai lam hte seng nna, Sara Kaba Kareng Brang Seng (Hkai Rem Magam Dap Lit Hkam, Hkai Rem Jawng Up) kaw nna ndai zawn tsun ai.

“Dai ni na gumhpraw jubili hte seng nna, 1997 ning September shata praw 4 ya shani hta Wunpawng Mungdan Shanglawt Asuya, Kachin Relief and Development Committee (KRDC) ni woi awn ai hte matut mahkai nna, Down Foundation nga ai ni hte matut let ningpawt ninghpang hkai rem jawng hpe 3 ning garum ai. 1997 ning kaw na 2000 ning du hkra re. Laning mi marai 16 hte Mai Ja Yang Wungau Bum kaw hpang wa ai re. 2007 ning Awng Ja Mare kaw nna gaw diploma jaw hpang ai re”

Hkai rem hpaji jawng hta sharin ya ai ginhpan (Subject) 16 nga ai hta hkai sun hte seng ai hpan 10, hkai rem hpe madi shadaw ai hpan 4, Ninggawn Mungmasa hte Rawt Malan Labau yawng shi kru re. 1997 ning kaw na dai ni 2022 ning du hkra rai yang, ningpawt ninghpang hte diploma sharin hkamla sai jawngma yawng marai 363 rai nna, ningpawt ninghpang gaw masat yan 20, lahta tsang diploma gaw masat yan 9 ya sharin nga ai lam chye lu ai.

Matut nna galaw sa wa na masing ni hpe, Sara Kaba tsun ai hta “Masa pyaw wa nna matut mahkai kaja wa jang gaw hkai sun dakkasu hpe hpaw sa wa na myit ai. Hkai sun dakkasu hpe hpaw jang gaw first year ni nre sha, diploma 3 ning lung ngut sai ni hpe 2 ning bai shalun nhtawm, hkai sun dakkasu jan mau jaw na re. Hkai Rem Magam Dap, Hkai Rem Jawng a madung pandung shadaw gaw, malu masha hpe hkru kat, hkrung grin ai de du wa hkra woi awn ga ngu ai re” nga nna tsun ai.

Dai ni na hkai rem hpaji sharin jawng hpaw ai 25^th ning hpring gumhpraw jubili hpawng hta Wunpawng Mungdan Shanglawt Hpung, Ginjaw Komiti Shingtau Tingnyang Up (II) Sara Kaba Sumlut Gam, Ningtau Ninggawn Amu Madu, Salang Kaba Labang Doi Pyi Sa, Mungchying Uphkang Dap, DGA Lit Hkam Salang Kaba Labya Tang Gun, nawku hpung woi Sara Kaba ni, Magam Dap, Makan Dap shagu na lit nga ai salang ni hte myit su kanu kawa ni yawng marai 300 daram sa du shang lawm ai lam chye lu ai.