Ramma nhtoi masat chyum laika sharin hpawng galaw

Manmaw Ginwang Manje Buga Hkalup Hpung kaw nna woi awn let, Ramma nhtoi masat chyum laika sharin hpawng hpe October shata praw 6 ya shani manam zup nhtawm, praw 7 hte praw 8 lahkawng ya sharin nna praw 8 ya shana daw hta ap nawng hpawng galaw na re lam chye lu ai.

Sharin sara hte ga baw ni gaw, Rev. Nan Lung (Ramma Hte Nawku Hpung A Matut Mahkai Lam), Rev. Hpakawn Naw Seng (Ramma Hte Karai Masa), Rev. Dr Hkalam Sam Son (Hkristu Hta Amyu Hte Mungdan Gawgap Ga) ngu ai ga baw ni hpe sharin ya nga ai re.

Sharin hpawng hta Manje Buga Hpung Ramma, Lawu Pa Layang Buga Hpung Ramma hte Shawnghtawk Buga Hpung na Ramma ni yawng marai 200 daram sharin hkamla nga ai lam, Manje Buga na salang langai tsun ai.

Bai du wa na ramma sharin hpawng ni hta gaw, htunghking hte seng ai lam ni hpe madung dat sharin sa wa na re lam, Manje Buga Hpung Ramma Hpa-awn tsun dan ai kaw na chye lu ai.