KIA Masat (34) Dap Dung ginra hta gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (34) Dap Dung ginra, Man Dung mare makau kaw, October shata 17 ya jahpawt 9:00am aten hta gumshem Myen hpyen hpung ni hte KIA ni gasat gala majan byin ai.
Gumshem Myen hpyen n gun (200) daram, KIA ni nga ai shara de htu shadut chyinglau shang wa ai majaw, gasat poi byin ai re. Shani hkying 11:20am aten hta KIA, KPDF pawng hpawm hpyen hpung ni kaw nna, Man Dung Gumshem Myen hpyen dap hpe sa htim gap gasat ai lam mung nga ai hpe chye lu ai.
Kutkai kaw na Sinli yu wa ai lam, Asia world gate makau kaw lai wa lai sa mungshawa modo ni hpe gumshem Myen Balik ni laja lana sawk jep nga ai lam, buga masha ni tsun ai kaw na chye lu ai.
Lai wa sai September shata 29 ya shani hta mung, Man Dung Gumshem Myen Hpyen Dap Hk.L.Y (130) dap hte Gumshem Balik Dap hpe KIA, KPDF pawng hpawm hpyen hpung ni sa htim gap gasat nhtawm, Balik Dap hpe wannat jahten kau ya ai lam nga sai re.
