KIA hte Myen hpyen ni gasat gala majan byin
Mungmyit Sinli Ga (Kachin Sub-State), KIA Masat (4) Dap Ba, Masat 8 Dap Dung ginra hta October shata 19 ya shana maga hkying 2:35pm aten, KIA hte gumshem Myen hpyen dap ni gasat gala majan byin ai lam, lit nga ai Salang ni kaw na chye lu ai.
Man Dung kawn Namdu de yu wa ai gumshem Myen hpyen dap, Dapnu (101) kata na hpyen n-gun (50) jan hte KIA ni Gyu Ban hte Pang San lapran kaw gasat gala majan byin ai re lam chye lu ai.
October shata 17 ya shani KIA Masat (4) Dap Ba, Masat (34) Dap Dung hpyen hpung ni shara jahkrat nga ai de, gumshem Myen hpyen dap, Dapnu (101) kata na hpyen n-gun (100) jan, U Mang maga Wan Jak hkraw kawn htu shadut lung wa ai majaw, KIA hte PDF pawng hpawm hpyen hpung ni gasat gala majan byin ai lam chye lu ai.
Gasat gala majan byin ai shara de, Loi Kang kaw du nga ai gumshem Myen hpyen n-gun (40) daram hpung ni sinat kaba 81mm gap garum ya nhtawm, Man Dung hpyen dap Hk.L.Y (130) dap ni mung sinat kaba 40mm hte gap bun ai lam chye lu ai.
