Jinghpaw sharin laika hte seng ai ningmu jahkrup hpawng galaw

Ginjaw hpaji dap kaw na woi awn galaw ai, Jinghpaw sharin laika hte seng ai ningmu jahkrup bawng ban hpawng hpe October shata 21 ya shani hkying 9:30am aten, Laiza lapran tsang jawng kaw galaw ai.

Hpawng hpaw mungga hpe Ginjaw Hpaji Dap Lit Hkam, Du Kaba Wa Na Yaw Htung tsun ai hta

“Anhte galaw sa wa ai jinghpaw laika textbook kaw gaw, anhte Kachin a lam Kachin hte seng ai lam yawng ndai textbook kaw mai byin ai made bang nna, ma ni hpe sharin mat wa ga ngu yaw shada ai, ya anhte rawt malan asuya naw re hpang e asuya rai wa shaloi mung, anhte Wunpawng amyu sha ni Wunpawng mungdan sha ni a jinghpaw laika gaw ya kaw nna yawng lawm ai hku galaw sa mat wa ga” nga nna Du Kaba tsun ai.

Anhte Wunpawng mungdan shanglawt asuya up hkang ai ginra hta hpaji masa lam hpe tinang lagaw tinang tsap lu hkra woi galaw wa ai, hpaji masa ni galaw sa nga yang Myen mung asuya kaw nna shapraw da ai textbook hpe sharin gaw nbyin mat ai, tinang a masa lam yan hpe e ndai jawng kaw sharin ya ra ai, anhte Wunpawng myu sha ni a masa hpe e lawm ai textbook galaw la ra ai nga nna Du Kaba matut tsun ai.

Hpawng hta Ginjaw Ginra Ginwang Ginjaw, Sinpraw Ginwang Ginjaw, Sinpraw Dingda Ginwang Ginjaw hte laiza Muklum kata na Hpaji du ni, Jinghpaw laika hpe ta tut sharin nga ai jawng sr. srn. magam gun ni, sa du shang lawm nhtawm, laksan hku saw shaga ai Hkai Rem Magam Dap, Ginjaw Hkam Ja Dap hte Htunghking hte Laili Laika Magam Dap kaw nna mung sa du shang lawm bawng ban ai lam chye lu ai.

Bawng ban hpawng hpe October (21) hte (22) lahkawng ya tup galaw na rai nna, Jinghpaw sharin laika hte seng ai ningmu jahkrup bawng ban hpawng hpe shawng nnan lang galaw ai re lam chye lu ai.