KIO masat ning htoi hpe shagrau ai yu ngwi pinra lamang galaw nga ai aten gumshem Myen hpyen ni nbungli bawm wa jahkrat ai majaw, masha marai (60) daram si hkala hkrum
KIA Masat (9) Dap Ba ginra, Anang Pa kaw October shata 23 ya shana hkying 8:40pm jan aten hta (62) ning hpring KIO masat ninghtoi hpe shagrau ai hku nna, tau na galaw ai golf kumhpa shagrau yu ngwi pinra lamang galaw nga ai aten hta gumshem Myen hpyen ni Jet nbungli (3) hte bawm wa jahkrat bun ai majaw, magam gun ni hte mungshawa ni yawng marai (60) daram si, hkala hkum ai lam, ginra shiga lawk kaw na chye lu ai.
Asak sum mat ai hta magam gun, du gyi salang nkau ni, lauban ni, yu ngwi ninghkring Lahpai Aurali, Keyboard sara Zahkung Zau Mun & Ko King hte poi yu shawa masha ni rai nna, Lahtaw Zau Ding (Sumla Hkrung Director, Wunpawng Shingni Hpung Ningbaw Usa) hte yu ngwi shingni nkau mi hkala hkrum ai lam chye lu ai.
Ndai zawn amyusha ni sum machyi yawn hkyen hkrum nga sai majaw, Wunpawng Mungdan Shanglawt Hpung, Ginjaw Komiti kaw nna, October shata 24 ya shani mungdan ting na Magam Dap Ginjaw Rung yawng hte Hpaji Jawng shagu hta Mungdan Dawnghkawn hpe dawmi shayu nhtawm, yawn hkyen masat masa galaw ai re.
Ya aten Hpakant de sa ai mungshawa modo, cycle ni hpe mung gumshem Myen hpyen ni, Maran Kahtawng hte Namya mare shagyit (Gate) ni hta laja lana sawk jep nga ai lam nga ai.
Wunpawng Mungdan Shanglawt Hpung, Kachin Independence Organisation (KIO), hpe lai wa sai 1960 ning October shata (25) ya shani hpaw hpang dat ai rai yang 2022 ning October shata (25) ya hta (62) ning hpring sai rai nga ai, ndai masat ninghtoi hpe mungdan kata hte maigan mungdan de du chyambra nga ai Jinghpaw Wunpawng Amyusha ni kaw nna mung KIO masat ninghtoi hpawng hpe galaw nga ai re.
