KIA hte Myen hpyen hpung ni gasat gala majan byin
KIA Dap Ba ( 2 ), Dap Dung ( 6 ) ginra hta shamu shamawt nga ai Myen hpyen dap Hk.L.Y ( 252 ) na hpyen hpung hte KIA Mungshawa Hpyen Hpung ( MHH ) ni, June 17 ya jahpawt hkying 6:05am aten kawn hkying 6:25am aten du hkra, Nam Sheng mare hte Labang kahtawng lapran, Gala Kawng kaw gasat majan byin ai lam, shawnglam shisawk ni kawn chye lu ai.
Gasat majan byin ai maga de, Nam Seng Hpunggyi jawng kaw nga ai Hk.L.Y ( 254 ) dap ni kawn sinat kaba hte gap bun ai majaw, Min Kung mare lawk ( 5 ) kaw pala si wa hkrat kapaw nna, salang U Soe Lwin a kasha Zar Ni Soe asak 16 a du kaw pala hkyep wa hkra ai lam chye lu ai.
Hkala hkrum ai Zar Ni Soe hpe Mugawng tsi rung de htaw yu wa ai raitim, ningma sawng ai majaw shana hkying 6:50pm aten hta Myitkyina tsi rung de bai htaw yu wa ai lam na chye lu ai.
