KIA Masat (3) Dap Dung hte Masat (15) Dap Dung ginra hta gasat gala majan byin
KIA Masat (5) Dap Ba, Masat (3) Dap Dung ginra, Nwan Kawng hte Machyang Mare makau kaw, October shata 31 ya shani ka-ang hkying 12:15pm aten hta gumshem Myen hpyen dap Hk.M.Y (381,387) hte Pyi Tu Tsit pawng hpawm hpyen hpung ni hte KIA ni gasat gala majan byin ai lam chye lu ai.
Gumshem Myen hpyen dap hte Pyi Tu Tsit pawng hpawm hpyen n gun 80 daram gaw, KIA ni nga ai shara Nwan Kawng maga de shamu shamawt chyinglau shang wa ai majaw, KIA ni hkap shingla gasat dat ai lam chye lu ai.
October shata 15 ya shani hta mung, gumshem Myen hpyen dap hte Pyi Tu Tsit pawng hpawm hpyen hpung ni, KIA Masat (3) Dap Dung ginra de chyinglau shang wa ai majaw, Chyihpwi lam Sani Hku Mare baw kaw KIA hpyen hpung ni hte ang katut gasat poi byin ai re.
KIA Masat (3) Dap Ba, Masat (15) Dap Dung ginra de, htu shadut lung wa ai gumshem Myen hpyen dap hte KIA ni October shata 31 ya shani gasat gala majan matut byin ai lam nga ai.
“Dai de hkying 2:00pm aten kaw na hkying 3:00pm jan aten du hkra, Nawng Pau Mare hte Lung Ja Mare lapran kaw gumshem Myen hpyen ni nga taw ai kaw KIA ni sa htim gap dat ai kawn agying agang gasat poi byin ai” nga nna lit nga ai salang langai tsun dan ai.
Gasat poi hta Myen hpyen si hkala masha hpe modo lahkawng hte Manmaw maga de htaw yu mat wa ai hpe myi chyaw mu ai masha ni tsun dan ai nga nna, salang wa matut tsun ai.
Gumshem Myen hpyen maga de si hkala law ai majaw, sinat kaba hkrup mara gap shadam ai hta Nmawk RCM nawku jawng wa na Ma shalet jawng kaw langai wa hkrat kapaw ai hta masha hkra hkala ai lam gaw nnga ai, Nawng Pau mare de mung wa hkrat kapaw ai lam chye lu ai.
Dai ni gaw gumshem Myen hpyen dap ni nbungli hte wa gap gasat ai lam gaw nnga ai, hpyen n gun gaw jat nga ding yang re majaw, gasat poi naw matut byin wa mai ai lam, shawnglam shisawk ni kaw na chye lu ai.
KIA Masat (15) Dap Dung ginra, Lung Ja Bum mayan hta October shata 22 ya shani kaw nna, gumshem Myen hpyen dap ni hpyen n gun tsa kaba hte hpyen man law law hpaw nhtawm, Jet nbungli ni hte bawm jahkrat htim gasat lung wa ai majaw, shani shagu ngu na gasat poi byin nga ai re.
Ndai zawn gasat gala majan byin ai hta Lung Ja Mare, Nawng Pau Mare, Wa Wang Mare hte Kum Bang Mare hkan na mungshawa marai 200 daram gaw, Nmawk Mare de gan koi yen nga ai lam na chye lu ai.
