A Nang Pa kaw asak apnawng mat wa sai Shanglawt magam gun ni hte mungshawa ni a matu, mara raw akyu hpyi hpawng galaw
Wunpawng Mungdan Shanglawt Hpung, Ginjaw Komiti kaw nna lam masan ya ai kata, Ninggawn Daju Hkristan Komiti kawn lata tut bungli lit la nhtawm, A Nang Pa kaw asak apnawng mat wa sai Shanglawt magam gun ni hte mungshawa ni a matu, akyu hpyi ya ai hpawng hpe November shata praw 4 ya shani Laiza kaw galaw ya ai lam chye lu ai.
Ninggawn Daju Hkristan Komiti Ningbaw, Salang Kaba Chyana Zau Awn (Htunghking Hte Laili Laika Magam Dap, Lit Hkam) kaw nna mara raw akyu hpyi la ra ai ga baw ni hpe tsun shana ai lam galaw ai. Dai hpang nawku hpung woi sara kaba ni kaw nna, Karai Kasang kaw akyu hpyi htinglu htinglai ya ai.
Akyu hpyi hpawng hta Ginjaw Komiti Salang ni, Magam Dap na ningbaw ni hte nawku hpung woi sara kaba ni sadu shang lawm ai lam chye lu ai.
Lai wa sai October shata 23 ya shana hking 8:45pm aten hta A Nang Pa kaw 62 ning hpring KIO masat ninghtoi hpawng hpe shagrau ai ninghpaw yungwi pinra lamang galaw nga ai aten e, gumshem Myen hpyen ni Jet nbungli 3 hte bawm wa jahkrat bun ai majaw, Hpung magam gun ni, Shanglawt magam gun ni, mying gumhkawng ai yu ngwi ninghkring ni, sut du lauban ni hte mungchying kanu kawa ni law law asak apnawng, hkala hkrum lai wa sai re.
