KIA Masat 8 Dap Dung hte Masat 9 ginra hta gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat 8 Dap Dung hte Masat (6) Dap Ba, Masat 9 Dap Dung ginra lapran, Nawngswi makau Bala Myint Chya Kung kaw, November shata 13 ya jahpawt hkying 6:27am aten kaw nna hkying 7:55am aten du hkra, KIA hte gumshem Myen hpyen n gun 50 daram hpung ni gasat poi byin ai lam chye lu ai.
“Gasat poi byin ai hta gumshem Myen hpyen maga na si hkala yawng marai 5 re lam na lu ai, anhte maga gaw hpa nra ai” nga nna shawng lam na lit nga ai salang langai tsun ai.
Gumshem Myen hpyen dap, Hk.L.Y (45, 241, 242) dap na n gun 50 daram hpung ni gaw, Kutkai kaw na Muse maga de lai lung wa na hpyen lang arung arai malu masha htaw ai modo 22 hte hpri gang tank modo 1 hpung ni hpe shimlam la ya ai hpyen hpung ni re lam, salang wa tsun ai.
Gasat poi byin nga ai aten hta KIA ni nga ai maga de, Shuhkinta kaw nga ai gumshem Myen hpyen ni sinat kaba 4 lang gap bun ai, Kutkai dap kaw nna mung, sinat kaba 6 lang gap bun ai lam chye lu ai.
Dai na maga hkying 4:30pm aten hta mung, numdaw kalang bai gumshem Myen hpyen modo hpung ni hpe KIA Masat (6) Dap Ba, Masat (9) Dap Dung hpyen hpung ni, Namhpakka makau Hpahkyip kaw hkap gap gasat ai lam chye lu ai.
November shata 12 ya shani hta mung, KIA Masat (10) Dap Ba, Masat (2) Dap Dung ginra, Banglum Bum makau Namba Tep hte Namhu lapran kaw gumshem Myen hpyen dap hte KIA ni gasat poi byin ai re.
