KIA Masat (26) Masat (46) Dap Dung ginra ni hta gasat gala majan byin
KIA Masat (7) Dap Ba, Masat (46) Dap Dung ginra hte KIA Masat (9) Dap Ba, Masat (26) Dap Dung ginra ni hta gumshem Myen hpyen dap hte KIA ni gasat gala majan matut byin nga ai lam chye lu ai.
Dai ni bat hpang mali ya, November shata 17 ya shani hkying 11:00am aten hta KIA Masat (9) Dap Ba, Masat (6) Dap Dung ginra, Gwihka makau Sapbya Chaung maga na shamu shamawt pru wa ai gumshem Myen hpyen ni hpe KIA ni bawm hte shawng hkap shingla gasat ai hpang sinat kaji ni hte lahkawng maga gasat poi byin ai lam chye lu ai.
KIA Masat (9) Dap Ba, Masat (26) Dap Dung ginra, Gwi Hka makau Lagat Madi kaw November shata 15 ya shana daw hkying 1:25pm aten hta gumshem Myen hpyen ni KIA ni nga ai maga de gale pru wa ai majaw gasat poi byin ai re. KIA Masat (9) Dap Ba ginra hta shani shagu ngu na gasat gala majan byin nga ai lam chye lu ai.
KIA Masat (7) Dap Ba, Masat (46) Dap Dung ginra hta mung, November shata 15 ya shani KIA ni nga ai shara, Saw Law Hka Lawng mare dingsa de gumshem Myen hpyen dap hte Pyi Tu Tsit pawng hpawm hpyen hpung ni chyinglau pru wa ai majaw, gasat poi byin ai re.
Gumshem Myen hpyen dap hte Pyi Tu Tsit pawng hpawm hpyen n gun 200 daram gaw, KIA ni nga ai shara de, hpyen man 3 hku nna htu lung wa ai hpe hkap gap gasat ai kawn gasat poi byin ai lam, shawng lam shi sawk ni kawn chye lu ai.
KIA Masat (3) Dap Ba, Masat (15) Dap Dung ginra, Lung Ja Bum mayan de mung, November shata 16 ya shana daw hkying 1:10pm aten kaw nna hkying 1:45pm aten du hkra, Nmawk gumshem Myen hpyen dap, Hk.M.Y (437) Dap kawn laknak kaba 105mm hte 5 lang, Masat (1) Dap Dung ginra, Nam Sai mare shinggan mayan de laknak kaba 81mm hte 3 lang gap shadam bun ai lam, ginra masha ni kaw na chye lu ai.
