KIA Masat (12) Dap Dung ginra hta gasat gala majan byin
KIA Masat (3) Dap Ba, Masat (12) Dap Dung ginra de shamu shamawt chyinglau hkawm ai, gumshem Myen hpyen hpung ni hte KIA ni November shata 18 ya jahpawt hkying 9:30am aten hta kalang hkying 11:30am aten hta kalang numdaw lahkawng lang gasat poi byin ai lam chye lu ai.
“Dai hpawt hkying 9:30am aten hta Tan Tada mare makau kaw numdaw kalang gap hkat ai, dai hpang hkying 11:30am aten hta, mi gap hkat ai shara hte kade ntsan ai kaw numdaw lahkawng lang bai gap hkat ai nga na lu ai. Myen hpyen gaw gara dap re atsawm n chye ai, n gun gaw 100 daram re nga na lu ai” nga nna lit nga ai salang langai tsun shana wa ai.
Gumshem Myen hpyen dap a, Jet Fighter nbungli langai mung, dai ni gasat gala majan byin ai shara kaw numdaw 5 lang wa pyen gawai ai lam nga ai raitim, bawm jahkrat gap bun ai lam gaw nnga ai, nga nna salang wa matut tsun ai.
November shata 15 ya shani hta KIA Masat (12) Dap Dung ginra, Tsi Ping hte moi na Japan nbungli pa kaw gaw, gumshem Myen hpyen ni nbungli bawm wa jahkrat bun ai majaw, mungshawa marai 2 hkala hkrum ai lam nga ai hpe na chye lu ai.
Ndai laman hta gumshem Myen hpyen dap ni KIA ni nga ai shara shagu ngu na de, shawoi na hta grau nna hpyen shamu shamawt chyinglau shang wa ai majaw, shani shagu ngu na gasat gala majan bai byin nga ai re.
