Gumshem Myen hpyen dap kawn KIA ni nga ai shara de nbungli bawm wa jahkrat bun

KIA Masat 8 Dap Ba ginra de, November shata 21 ya shani gumshem Myen hpyen dap ni KIA ni nga ai maga de bawm wa jahkrat bun ai lam chye lu ai.

Ndai nbungli gaw, Mandalay Tada Oo kaw nna lung wa nhtawm, dai hpawt hkying 10:30am aten kaw nna hkying 11:00am aten laman hta bawm wa jahkrat bun ai lam chye lu ai.

Dai ginra hta gasat gala majan nnga ai raitim, gumshem Myen hpyen dap ni gaw nbungli hte bawm jahkrat bun ai lam jahkring hkring galaw nga ai re.

Myitkyina Muklum, Golf pa makau na gumshem Myen Balik Dap kaw mung, November shata 21 ya shana hkying 6:30pm aten daram hta bawm 3 lang hte sinat kaji gaw, minute 5 daram na hkra ngoi wa ai lam, buga masha ni kaw na chye lu ai.

Ya na zawn sinat bawm nsen ni, a kajawng sha, ngoi wa ai majaw mungshawa ni hkrit tsang nga ai rai nna, masha hkra hkala ai lam nga nnga tup hkrak n chye lu shi ai lam, buga masha ni tsun ai kaw na chye lu ai.