Marit shingran ngauhtawn yungwi pinra lamang galaw
Laiza makau Je Yang hpyen yen dabang KBC Gawknu kaw, November shata 26 ya shana hkying 3:00pm aten daram kaw nna, dinggai dingla ni a, marit shingran ngauhtawn yungwi pinra lamang hpe galaw la lu sai lam chye lu ai.
Ndai marit shingran ngauhtawn yungwi pinra lamang hpe Je Yang hpyen yen dabang na Rev. Maru Brang Kum woi awn nhtawm, lawk shagu na mahkawn hta myit lawm ai dinggai dingla ni hpe saw shaga let, galaw na matu hkyen da ai raitim nkau gaw nlu shanglawm ai mung nga ai, ndai yungwi lamang gaw labau mazing hku nna galaw ai re lam, Rev. Maru Brang Kum tsun ai.
Yungwi pinra galaw ai a yaw shada lam hpe Rev. Maru Brang Kum ndai zawn tsun ai.
“Myit yup mat wa sai dinggai dingla ni myit bai rawt wa nna, mahkawn bai hkawn wa na matu, nawku jawng bai kam sa wa na tinang a nawku mahkawn ni hpe bai kam hkawn wa na matu, myit n shayup yang masha gaw hpa mung mai byin ai tsun ga nga yang American Gumsan Magam Donald Trump hte Joe Biden yan pi asak 80 ning du sai tim Gumsan Magam gashun mungdan uphkang na naw myit nga ai ngu ai hpe dai kaw na myit rawt hpang nna, gumgai dingla ni hpe myit sharawt ai lam mung re.
Dai ni anhte Wunpawng sha ni a, Wunpawng nsen, Wunpawng madum, Wunpawng chun, ni hpe ya na ma ni gaw nau n chye gayaw hkawn mat wa sai dai majaw, ya na masha ni hpe gayaw dan ai mung rai, Wunpawng sen, Wunpawng madum, Wunpawng chun ni hpe kadai Wunpawng sha ni mung, chye na la mu ga, myit rawt mu ga, yungwi kasi yu la mu ga ngu nna yaw shada let galaw ai re”
Ya hte sha asak 16 ning a lahta na ma ni mung, yungwi pinra lamang galaw ma ai shanhte grai pyaw ma ai, ya na ramma ni hkawn ai gaw moi na dinggai dingla ni gaw nau bai nsha ra, nau bai nchye na, moi na mahkawn hkawn dan jang dinggai dingla ni grai bai sha ra, dai majaw ramma ni nlawm ai dinggai dingla san re ai yungwi pinra lamang galaw na matu myit lu ai hte galaw ai lam rai nga ai. Ndai yungwi pinra lamang hpe nawku hpung hku, dabang hku aming jahkrat nna galaw ai nre sha tinang myit lu nna woi galaw ai re, nga nna sara kaba tsun ai.
Rev. Maru Brang Kum gaw shawng de, Mungmyit Sinli Ga (Kachin Sub-state), Mungji Buga kaw Hpung Up magam bungli hpe shaning na na gunhpai lai wa nhtawm, 2009 ning hta Jinghpaw Mung, Wunpawng Mungdan Shanglawt Asuya, gawsharawt masing mare rai nga ai, Ban Sau mare kaw wa shanu nga ai hpang 2011 ning kaw nna, gumshem Myen hpyen dap hte tinang KIA ni gasat gala majan bai byin wa ai majaw, ya aten Je Yang hpyen yen dabang hta shanu shingbyi nga ai re. Sara Kaba gaw asak 78 ning rai nna, Karai Kasang a magam bungli hta naw gunhpai nga ai hpe chye lu ai.
