Masat yan (1) lawu tsang tara agyi majat wunkat yu hpang galaw
Wunpawng Mungdan Shanglawt Asuya kaw nna, lam masan ya ai hte maren Tara Masa Magam Dap ta tut lit la nhtawm, masat yan (1) lawu tsang tara agyi majat wunkat yu hpawng hpe, November shata 24 ya shani Alen Bum kaw galaw la lu sai lam chye lu ai.
Ndai wunkat gaw, lawu tsang Ginwang Daw Tara Rung hta mu gun nga ai tara agyi ni hpe majat jaw ai rai nna, wunkat yu lakmat hkamla ai jawngma yawng marai 29 re lam chye lu ai.
Wunkat hta sharin ya ai gyin hpan (subject) ni gaw, Tara Masa Magam Dap a rung bungli, Tara Rung hte seng ai amu jum magam bungli, Tara Masa lam masan, tara jeyang dawdan ai lam ni hpe sharin ya ai, tara upadi hte seng ai lam, sakse hkam upadi hte seng ai lam, mara amu hte seng ai lam, upadi hpe gara hku bai hka ja ra ai lam ni, Balik hte tara rung hkri dun lam ni hpe sharin ya ai re lam, Tara Masa Magam Dap, Amu Madu Salang Kaba Shadau Awng Mai tsun ai.
Salang Kaba Labang Doi Pi Sa (Nintau Ninggawn Amu Madu) kaw nna, Ninggawn Mungmasa hpe sharin ya ai, Du Kaba Zungbuk Htan (Ningbaw Malai II) kaw nna, Rawt Malan Labau hpe sharin ya nhtawm, Htoi Gender ni kaw nna mung, civil society hte seng ai lam hpe tsun dan ai, nga nna Salang Kaba tsun ai.
Masat yan (1) lawa tsang tara agyi majat wunkat hta Uru Ginwang Ginjaw, Ginwang Daw Tara Rung mu gun ni, Sinna Ginwang Ginjaw kata na tara rung mu gun ni, Sinna Dingda tara rung mu gun ni, Sinpraw Ginwang Ginjaw, tara rung mu gun ni, Ginjaw Ginra, Ginwang Ginjaw kata 6 na tara agyi ni, Amu Madu ni shanglawm sharin hkamla lu sai lam chye lu ai.
Lahta tsang masat yan (3) Tara Masa Magam Dap a upadi machye machyang wunkat hpe du wa na December shata praw 5 ya shani kaw nna, December shata htum hta matut nna galaw sa wa na re lam chye lu ai.
Wunpawng Mungdan Shanglawt Asuya, Kongsi kaw na shapraw dat ai ahkang aya nga taw ai hte maren, Tara Masa Magam Dap hta jai lang lu na matu, upadi pukma kaba 129 nga ai rai nna, pukma kaji 300 jan nga ai re. Tara Masa Magam Dap hpe lai wa sai 2008 ning October shata praw 10 ya shani hpaw ninghtan dat ai re hpe mung chye lu ai.
