KIA Masat (46) Dap Dung ginra hta gasat gala majan byin
KIA Masat (7) Dap Ba, Masat (46) Dap Dung ginra, Saw Law mare makau kaw, November shata 29 ya shani hta gumshem Myen hpyen dap, Pyi Tu Tsit, BGF pawng hpawm hpyen hpung ni hte KIA ni gasat gala majan byin ai lam chye lu ai.
Gumshem Myen hpyen dap a lagaw lata tai ya nga ai, Pyi Tu Tsit hte BGF jarit sin pawng hpawm hpyen hpung ni, Saw Law mare makau kaw hkying nga ai aten hta KIA sa htim gap ai kawn gasat poi byin ai re lam, shawng lam shiga lawk kaw na chye lu ai.
Gasat gala majan hta tai hpyen maga si hkala masha lawm ai hte machyu pala nkau hpe mung, padang dip zingla lu ai lam chye lu ai.
KIA Masat (9) Dap Ba, Hpakant ginra hta mung, gumshem Myen hpyen dap ni shani shagu ngu na, shamu shamawt chyinglau hkawm nga ai hta bawm ni jahkring hkring ngoi wa ai majaw, mungshawa ni hkrit tsang nga ai lam, ginra shisawk ni kaw na chye lu ai.
