KPDF hte gumshem Myen hpyen dap ni gasat gala majan byin
KIA Masat (3) Dap Ba, Masat (12) Dap Dung ginra hta December shata praw 4 ya shana maga hkying 4:10pm aten, KPDF, AA pawng hpawm dap ni hte gumshem Myen hpyen dap ni gasat gala majan byin ai lam chye lu ai.
Dai gumshem Myen hpyen dap ni gaw Si Bing kaw nna pru wa ai Hk.L.Y (276) dap na hpyen n-gun (60) daram ni rai nna, Pin Chying kaw ang katut gasat gala majan byin ai re lam lit nga ai salang ni kaw na chye lu ai.
KIA Masat (3) Dap Ba, Masat (27) Dap Dung ginra hta lai wa sai praw 3 ya shana daw hkying 3:50pm aten hta mung, Han Htet hpungkyi jawng kaw du nga ai Hk.M.Y (319, 601) hte Hk.L.Y (223) dap na pawng hpawm hpyen n-gun (100) daram hpe KIA ni bawm hkap adem bun gasat gala byin ai lam chye lu ai.
Mungmyit Sinli Ga (Kachin Sub-state) KIA Masat (6) Dap Ba, Masat (36) Dap Dung ginra hta mung, December shata praw (1) ya shani hkying 10:48am aten, Hk.M.Y (420) dap na hpyen n-gun (70) daram hte KIA ni gasat gala majan byin ai lam chye lu ai.
