Rev. Dr. Hkalam Samson hpe gumshem Myen hpyen dap ni rim woi da

KBC Ningbaw Usa Sara Kaba Rev. Dr. Hkalam Samson hpe December shata praw 5 ya shani gumshem Myen hpyen dap ni rim woi mat wa ai lam KBC kawn ndau laika shapraw da ai kaw na chye lu ai.

Sara Kaba gaw Thai mungdan de tsi tsi sa na matu, Mandalay nbungli daru kaw du nga yang, rim woi mat wa hkrum ai re hpe chye lu ai.

Ya na zawn Sara Kaba hpe rim woi da ai hpe lawan dat ya na matu, KBC ginjaw kaw na ndau laika shapraw ai sha n-ga, KBC USA Kachin kaw na mung ndau laika shapraw da ai lam chye lu ai.

Sara Kaba gaw KBC Amu Madu magam lit hpe 8 ning, Ningbaw magam lit hpe (4) ning gunhpai lai wa sai rai nna, ya aten KBC hpaji jaw magam lit hpe gun hpai nga ai re.