Gumshem Myen hpyen pyada dap hpe KIA ni sa gap
KIA Masat (9) Dap Ba, Masat (6) Dap Dung ginra, Seng Tawng pyada dap hpe December shata praw 6 ya jahpawt hkying 8:40am aten, KIA ni drone bawm wa jahkrat bun ai hta gumshem Myen hpyen dap maga na si hkala hkrum ai lam lit nga ai salang ni kaw na chye lu ai.
KIA Masat (3) Dap Ba, Masat (12) Dap Dung ginra hta mung, December shata praw 5 ya shani hkying 9:10am aten, Han Htet mare kaw na modo (1) hte pru wa ai Hk.L.Y (223) dap na hpyen n-gun (50) daram hpe KIA ni Man Ta makau kaw bawm hkap adem bun ai lam chye lu ai.
Matut nna Masat (12) Dap Dung ginra rai nga ai Nmawk kaw dap jung shara jahkrat nga ai Hk.M.Y (437) dap na gumshem Myen hpyen dap ni kaw nna, December shata praw 5 ya shani Nam Sai mare baw maga de 120mm gap shadam bun ai lam nga ai.
KIA Masat (2) Dap Ba, Masat (20) Dap Dung ginra hta mung, December shata praw 5 ya shana maga hkying 4:30pm aten, Dum Bung kaw nga ai gumshem Myen hpyen dap ni, KIA ni Customs hta ai Sai Ling Hka hte Dum Bung lapran de 81mm (2) lang gap bun ai majaw, KIA ni mung sinat kaba bai nhtang gap bun ai lam chye lu ai.
