Sama ginwang sasana lahta tsang jawng hta ginsup shingjawng lamang galaw
Sama ginwang sasana lahta tsang jawng Nawng E Hku hta The First Arena Fight ngu ai ga baw hte December shata 12 ya shani kaw nna, 15 ya shani du hkra ginsup shingjawng lamang hpe galaw mat wa na lam lit nga ai Sara tsun ai.
Ginsup lamang hpe Sama ginwang sasana ginsup woi awn komiti ni woi awn galaw ai rai nna, KG kaw na tsang 12 du hkra na jawngma ni yawng shang lawm ginsup shingjawng mat na re lam chye lu ai.
Ginsup ai lamang galaw ai a yaw shada lam hpe lit nga ai Sara Lagoi Mung Hkai tsun ai hta “Hkum hkrang hkamja na lam, ginsup ai a majaw bawnu ni ningtawn wa u ga, shanhte na sak hkrung lam kaw dang ai ngu ai hpe hkam sha shangun mayu ai, dang hkra galaw ra ai dang nan dang ra ai ngu myit jasat hpe bang la let shakut shangun mayu ai” nga nna tsun ai.
Ndai ginsup lamang gaw 2022, 2023 hpaji ladaw a ginsup lamang rai nna, gaw din ta din, u mun, tsaw gumhtawn tsan gumhtawn, ka shingjawng, hkrang shala, sha shingjawng ai zawn re ginsup hpan amyu myu lawm ai lam chye lu ai.
Sasana jawng hta jawngma yawng marai 550 jan laika hpaji hpe sharin hkamla nga ai rai nna, sharin sara/num ni yawng marai 40 rai nhtawm, ya na zawn ginsup ai lam hpe shaning shagu ginsup hpan amyu myu gyin shalat la let ginsup mat na lam chye lu ai.
