Gumshem Myen hpyen dap hte Pyi Tu Tsit pawng hpawm hpung ni hpe KIA ni bawm hte hkap gap gasat
KIA Masat (2) Dap Ba, Masat (43) Dap Nawng Dap Dung ginra hta shamu shamawt chyinglau hkawm ai, gumshem Myen hpyen dap hte Pyi Tu Tsit pawng hpawm hpung ni hpe, December shata 17 ya shani Nam Hpyek hte Nawng Lung Kawng Ra mare lapran kaw KIA ni bawm hte hkap gap gasat ai lam chye lu ai.
Gumshem Myen hpyen dap Hk.L.Y (297) hte Pyi Tu Tsit pawng hpawm hpyen n gun (100) daram modo hte shamu shamawt chyinglau hkawm ai kaw KIA ni numdaw lahkawng lang hkap kapaw bun ai re lam, shawng lam shiga lawk kaw na chye lu ai.
KIA Masat (2) Dap Ba, Masat (14) Dap Dung ginra, Lamung mare kaw shara jahkrat nga ai Pyi Tu Tsit ni a nta ginsum hpe, December shata 16 ya shani hta KIA ni wan nat jahten kau ai lam nga ai.
KIA Masat (9) Dap Ba, Masat (26) Dap Dung ginra hta mung, dai ni December shata 17 ya jahpawt hkying 4:00am aten daram hta gumshem Myen Hpyen Dap, Dapnu (Tatma- 33) kata na hpyen n gun 100 daram, Tung Fung modo kaba 2 hte Ale Du shara kaw wa htaw sa da ai lam chye lu ai.
Ndai gumshem Myen hpyen hpung ni KIA ni shara la nga ai de, ni kahtep wa jang gaw, shanhte koi mat ai lam nnga yang gasat poi mai byin wa ai lam, lit nga ai salang langai tsun ai kaw na chye lu ai.
KIA Masat (5) Dap Ba ginra, Seng Mai Mare grup yin shara ni hta mung, December shata 17 ya jahpawt hkying 1:00am aten daram hta gumshem Myen hpyen dap ni, Jet Fighter nbungli hte bawm wa jahkrat bun ai lam, ginra shiga lawk kaw na chye lu ai.
