Sasana shang (100) ning hpring hte Buga hpung de (50) ning ja jubili poi galaw
Manmaw Ginwang, Laiza Buga Hkalup Hpung sasana shang ai (100) ning hpring hte buga hpung gaw de ai (50) ning hpring ja jubili poi hpawng lamang hpe Laiza Buga Hkalup Hpung nawku jawng wang hta December shata 16 ya shani kaw nna, 18 ya shani du hkra angwi apyaw hte galaw la lu sai re.
December shata (16) ya shani hta gaw hkalup hkam ai lam, kapang hpaw jubili htingnu dingshawn, htung hkying shat lit gun bang ai lam ni rai nna, (17) ya shani hta gaw mara raw akyu hpyi hpawng, magam gun jubili shagrau hpawng lamang ni, (18) ya shani hta gaw sasana shang (100) ning hpring hte buga hpung de (50) ning hpring ja jubili chyeju shakawn hpawng, hkristmas, ga shaka lu sha hpawng, shana na aten hta yu ngwi pinra hte kahkrang lamang ni hpe galaw ai re.
Hpung magam gun ni hte hpyen magam ai hta la ni hpe gaw Du Up tsang kaw na ni hpe kumhpa shagrau ai, Num ni hpe gaw Du Jum lahta kaw na ni hpe shagrau nhtawm, Salang Kaba ni hpe gaw Ginwang Up (D.O) madang ni hpe shagrau ai lam galaw ai, matut nna dinghku de (50) ning hpring sai dinghku ni hpe mung shagrau sha-a ai lam galaw ai, Ma (3) a lahta lu nna jan mau lu hkra shakut yu ai dinghku ni hpe shagrau sha-a ai lam galaw ai hta Laiza Buga Hkalup Hpung kata nga ai ni hpe shagrau ai re.
Magam gun jubili shagrau ai hta (50) ning hpring magam gun sai Rev. Lahpai Shing Rip hte Saranum Kaba. Lazing Lu Awng yan hpe ja jubili kumhpa shagrau na rai nna, (25) ning hpring magam gun sai Rev. Sumlut Gun Seng hte Saranum. Maran Bawk Mai yan re hpe chye lu ai.
1921 ning kaw nna, sasana shang hpang ai rai nhtawm, 1972 ning kaw nna, Laiza Buga Hkalup Hpung hpe gaw de wa ai hta 2022 ning kaw sasana shang (100) ning hpring sai hte buga hpung gaw de ai (50) ning hpring sai re.
Laiza Buga Hkalup Hpung hta kata kaw lawm ai mare kahtawng ni gaw Dunghung mare, Mung Seng Yang mare, Ja Htu Kawng mare, Sut Mung Awng mare, Sha-it Yang mare, Lawa Yang mare, Laja Yang mare, Loi Mawk Yang mare hte Man Sai mare nawku hpung ni re hpe mung chye lu ai.
