Gumshem Myen hpyen ni, Laiza makau grup yin shara ni de laknak kaba gap bun
Hka Ya Bumre Bum kaw dung ai gumshem Myen hpyen dap ni, December shata 19 ya shana maga hkying 3:15pm aten kaw nna, Laiza makau grup yin shara ni de, laknak kaba 9 lang ram gap bun ai lam chye lu ai.
Ginjaw ginra makau shara ni hta gasat gala majan byin ai lam nnga ai raitim, gumshem Myen hpyen dap ni laknak kaba hte hkrup mara gap bun ai sha n ga, December shata 17 ya jahpawt hta mung, KIA Masat (5) Dap Ba ginra, Seng Mai Mare grup yin shara ni kaw nbungli bawm wa jahkrat bun ai lam ni galaw nga ai re.
December shata 16 ya shani hta gaw, KIA Masat (5) Dap Ba, Masat 18 Dap Dung ginra, Hpun Pyen Bum de gumshem Myen hpyen modo 10 jan hte hpyen lang arung arai malu masha ni wa htawn tawn sai lam hpe mung na chye lu ai.
