Woi Chyai hpyen yen lawu tsang jawng hta hkrang pan madun lamang galaw

Woi Chyai hpyen yen lawu tsang jawng a shawng nnan lang na hkrang pan madun ai lamang hpe December shata 20 ya shani jahpawt hkying 9:00am aten kaw nna, shana de hkying 3:00pm aten du hkra Woi Chyai hpyen yen jawng hta galaw nga ai re.

December shata 24 ya shani du hkra 5 ya tut galaw sa wa na rai nna, ndai hkrang pan ni gaw 2014 ning kaw nna ya du hkra na lawu tsang jawngma ni soi wa ai hkrang pan ni kaw na lata la let, madun ai re lam lit nga ai Saranum ni tsun ai.

Hkrang pan soi ai a yaw shada lam gaw jawngma ni a myit ana hpe tsi ya lu na matu, hkrang pan hte seng ai ningpawt ninghpang (Nsam chya) ai lam hpe chye lu na matu, tinang a hkam sha lam mabyin lawng lam hpe mungkan de htawng madun lu na matu, shingni lam hta myit lawm wa lu na matu hte jawngma ni wuhpung wuhpawng hta bungli shang lawm shamu shamawt chye na matu re lam madun gawk hta ka madun da ai kaw na chye lu ai.

Madun poi a yaw shada lam gaw jawngma ni a atsam hpe sharawt ya lu na matu, hkrang pan hta grau nna myit lawm wa lu na matu, jawngma kanu kawa sara ni a mahkri shawn lam a matu, jawngma ni a ta maka jawng a shamu shamawt ai lam hpe kanu kawa ni chye lu na matu hte hkrang pan soi ai lam hta grau nna awng dang wa lu na matu re hpe mung chye lu ai.

Hkrang pan soi na ga baw ni hpe sara/num ni kawn saw ya let soi shangun ai hta anhte a dai daw buga, anhte a ru di, ngai nang hpe dum ai raitim nang nnga mat sai, anhte a myit mada ai shawnglam, hkrun lam ntsa na lam, nsin kaw na nhtoi, matut nmai mat ai sumri, ရွင္သန္ျခင္း၏လက္ေဗြမ်ား, anhte makoi rawng ra ai nhkun ni a lam hte ndai zawn re ai amaw nsam ngu ai ga baw ni a kata hkrang pan hpe soi sa wa ai hta ga baw langai hte langai a lachyum ni hpe mung madun gawk hta sanglang da ai re.

Woi Chyai hpyen yen lawu tsang jawng hpe 2013 ning kaw nna hpaw sa wa ai hta ya yang laika hpaji sharin hkamla nga ai jawngma yawng marai 300 jan rai nna, ya hkyak hkyak sharin nga ai sara/num marai 28 re lam chye lu ai.